Abadepite 14 basabye ko Perezida Biden akorerwa isuzuma ry’ubuzima bwo mu mutwe

Abadepite 14 basabye ko Perezida Biden akorerwa isuzuma ry’ubuzima bwo mu mutwe

Abadepite 13 n’uwahoze ari umuganga wa Barack Obama na Donald Trump ubwo bayoboraga Leta Zunze Ubumwe za Amerika, Dr Ronny Kackson, bandikiye Ibiro by’Umukuru w’Igihugu,White House, basaba ko Perezida Joe Biden akorerwa isuzuma ry’ubuzima bwo mu mutwe ryihuse kandi ibizubizo bikerekwa Abanyamerika ku mugaragaro.

Fox News yatangaje ko iyo baruwa yanohererejwe Perezida Biden ubwe n’Umuganga we Dr Anthony Fauci, yanditswe mu ijoro ryo ku wa Kane w’iki Cyumweru, nyuma y’imyitwarire bavuga ko igayitse uwo mukambwe w’imyaka 78 yagaragarije mu nama yahuriyemo n’abayobozi batandukanye.

Dr Ronny yagize ati “Ibi ntabwo twakomeza kubyihanganira. Ashobora kuba adakwiriye kuba Perezida wacu ubu ngubu bijyanye n’imiterere cyangwa imitekerereze ye.”

Impamvu zashingiweho mu gusaba ko Perezida Biden akorerwa isuzuma zirimo kuba akunda kwitiranya ibintu ibindi akabyibagirwa.

Nk’urugero mu mbwirwaruhame yatanze ku Munsi Mpuzamahanga w’Umugore wizihijwe ku wa 8 Werurwe 2021 yibagiwe izina rya Minisitiri w’Umutekano.

Ibyo byaje nyuma y’indi yatanze ku wa 30 Mata 2021 na yo yatumye abantu bacika ururondogoro kubera ukuntu yavuze inkuru y’ingendo yakoreye mu ndege ya Visi Pererezida, Air Force Two, n’izo yakoreye muri gari ya moshi; akitiranya ibihe zagiye zibamo cyane ko yavuze ko yazikoze ajya gusura nyina witabye Imana mu 2010, akongera akavuga ko yari mu mwaka wa kane wa manda ye nka Visi Perezida kandi ubibaze wasanga uwo mwaka wari 2013.

Ku wa 2 Werurwe 2020, ubwo yari muri Texas yiyamamaza hari ku wa Mbere nabwo yaribeshye avuga ko umunsi ukurikiraho ari “uwa Kane udasanzwe” aho kuvuga “uwa Kabiri udasanzwe”.

Byakomeje gutuma imitekerereze ye ikemangwa, kugeza ubwo asabiwe isuzuma ry’ubuzima bwo mu mutwe.

Abadepite basinye kuri iyo baruwa bose ni Aba-Républicains. Isuzuma nk’iryo ryakorewe na Perezida ucyuye igihe Donald Trump mu 2018.