Abahigira Amavubi babaye benshi:Nyuma ya KNC na Shaddyboo yemereye buri mukinnyi n’umuyobozi 2000$, ni batwara CHAN

Abahigira Amavubi babaye benshi:Nyuma ya KNC na Shaddyboo yemereye buri mukinnyi n’umuyobozi 2000$, ni batwara CHAN
Mbabazi Shadia uzwi nka Shaddyboo ku mbuga nkoranyambaga, yahigiye guha buri mukinnyi na buri muyobozi mu ikipe y’igihugu y’umupira w’amaguru (Amavubi) amadolari ya Amerika 2000 (2000$), nibaramuka batwaye irushanwa rya CHAN2020 riri kubera muri Cameroon.

Ni igitekerezo Shaddyboo yakuye kuri Munyakazi Sadate (wabaye Perezida wa Rayon Sports) na Kakooza Nkuriza Charles (KNC) washinze akaba anayoboye Gasogi United na Radio/TV1.

Sadate yari yahigiye guha buri mukinnyi w’iyi kipe na buri muyobozi 100$, mu gihe bari kuba batsinze ikipe y’igihugu ya Uganda ku mukino wabaye tariki ya 18 Mutarama 2021. Gusa aya mafaranga yabaciye mu myanya y’intoki, kuko banganyije ubusa ku bundi (0-0).

KNC na we kuri uyu wa 20 Mutarama 2021 yahigiye guha buri mukinnyi na buri muyobozi mu Mavubi 100$ mu gihe baba batsinze ikipe y’igihugu ya Maroc, mu mukino uraba kuri uyu wa 22 Mutarama 2021.

Shaddyboo yifashishije urubuga rwa Twitter, mu butumwa yanditse mu rurimi rw’Ikinyarwanda n’Icyongereza, yavuze ko amafaranga Sadate na KNC bahigiye gutanga, we azayakuba inshuro 20 mu gihe iyi kipe yazaba yegukanye iri rushanwa.

Yagize ati: “Amafranga Sadate na KNC batanze njye nzayakuba incuro 20 #Amavubi #CHAN2020.”

Yongeyeho ko Amavubi nagera ku mukino wa nyuma (Finale), azakuba umuhigo wa Sadate na KNC inshuro 10 (bivuze ko azaba 1000$). Ati: “Nashyika kuri Finale gusa ntatware igikombe nzakuba inshuro 10.”

Urubuga Currency Converter rutanga amakuru agezweho ku igereranya (ivunja) ry’amafaranga, rwerekana ko amadolari ya Amerika 2000, abarirwa mu mafaranga y’u Rwanda (RWF) 1,900,000.

like
0
dislike
0
love
0
funny
4
angry
0
sad
0
wow
0