Burundi: Batatu baheruka gutera amabuye imodoka za Perezida Ndayishimiye bakatiwe imyaka 30

Burundi: Batatu baheruka gutera amabuye imodoka za Perezida Ndayishimiye bakatiwe imyaka 30
Ubutabera bw’u Burundi kuri iki cyumweru, bwakatiye igifungo cy’imyaka 30 nyuma yo guhamwa n’icyaha cyo gutera amabuye imodoka zari ziherekeje Perezida, Evariste Ndayishimiye, bagamije kumugirira nabi.

Imodoka zari ziherekeje Perezida Ndayishimiye zaterewe amabuye ahitwa Musave, agace gaherereye muri Komini Kayanza ho mu ntara ya Kayanza.

Byabaye ku wa gatatu tariki ya 05 Kanama, ubwo umukuru w’igihugu cy’u Burundi yari yerekeje mu ntara ya Kayanza, mu ngendo zizenguruka Igihugu cy’u Burundi.

Amakuru avuga ko icyo gihe abantu batatu bateze imodoka zari ziherekeje Ndayishimiye bakazitera amabuye, gusa bakaza gutabwa muri yombi n’inzego zishinzwe umutekano.

Kuri iki cyumweru bariya bantu uko ari batatu, bakatiwe n’urukiko rwa Kayanza igifungo cy’imyaka 30 kuri buri umwe, nyuma yo guhamwa n’icyaha cyo gushaka kugirira nabi umukuru w’igihugu.

Perezida Evariste Ndayishimiye amaze amezi abiri ayobora u Burundi, gusa bivugwa ko mu bo basangiye inshingano hari abatamushaka, bigakekwa ko ari bo bari batumye bariya bantu ngo bamwivugane.

like
0
dislike
0
love
0
funny
0
angry
0
sad
0
wow
0