CHAN 2020: Cameroun yashinjwe gukoresha agacurama kapfuye nk'uburozi bwayifashije gutsinda Zimbabwe

CHAN 2020: Cameroun yashinjwe gukoresha agacurama kapfuye nk'uburozi bwayifashije gutsinda Zimbabwe

Umutoza w’Ikipe y’Igihugu ya Zimbabwe, Zdravko Logarušić, yashinje Cameroun gukoresha amarozi mbere y’umukino ufungura irushanwa batsinzwemo n’iki gihugu cyakiriye ku gitego 1-0.

Ku wa Gatandatu tariki ya 16 Mutarama nibwo hatangiye Shampiyona Nyafurika ihuza abakinnyi bakina imbere mu bihugu byabo (CHAN 2020), i Yaoundé muri Cameroun.

Ifoto yagiye ahagaragara mbere y’umukino ufungura irushanwa, yagaragazaga umutoza wa Zimbabwe, Umunya-Croatia Zdravko Logarušić, yerekana agacurama kapfuye, ayikurikije ikimenyetso cyanditseho amagambo agira ati “amarozi muri Cameroun”.

Uyu mukino wabereye kuri Stade Ahmadou Ahidjo i Yaoundé, imbere ya ¼ cy’abafana isanzwe yakira mu rwego rwo kwirinda ikwirakwira ry’icyorezo cya COVID-19, warangiye Cameroun itsinze igitego 1-0 cyabonetse ku munota wa 72 gitsinzwe na Salomon Banga.

Si ku nshuro ya mbere Cameroun ishinjwe gukoresha amarozi dore ko mu Gikombe cya Afurika cyo mu 2002, ubwo yahuraga na Mali, umutoza Winfried Schafer n’uwari umutoza w’abanyezamu Thomas Nkono bafashwe na polisi bashinjwa gushyira amarozi mu kibuga.

Undi mukino wabaye ku wa Gatandatu mu itsinda rya mbere, warangiye Mali itsinze Burkina Faso igitego 1-0 cyinjijwe na Siaka Bagayoko ku munota wa 70.

Kuri iki Cyumweru hateganyijwe imikino ibiri yo mu itsinda B, aho Libya ikina na Niger saa kumi n’ebyiri mu gihe Repubulika Iharanira Demokarasi ya Congo ikina na Congo Brazzaville saa tatu z’ijoro.

Itsinda C rizakina ku wa Mbere, aho Maroc ifite irushanwa riheruka izakina na Togo saa kumi n’ebyiri naho u Rwanda rukisobanura na Uganda guhera saa tatu z’ijoro.

Mbere y'umukino, umutoza w’Ikipe y’Igihugu ya Zimbabwe, Zdravko Logarušić, yashinje Cameroun gukoresha amarozi