Christian University Kaminuza yashinzwe na Dr Habumuremyi nayo yafunzwe

Christian University Kaminuza yashinzwe na Dr Habumuremyi nayo  yafunzwe

Kaminuza yashinzwe na Dr Pierre Damien Habumuremyi wahoze ari Minisitiri w’Intebe kuri ubu akaba yayoboraga Urwego rw’Igihugu rushinzwe Intwari, Imidari n’Impeta yafunzwe nyuma yo kugaragaramo urusobe rw’ibibazo bigira ingaruka ku ireme ry’uburezi n’imyigishirize.

Christian University of Rwanda, yafunzwe mu gihe Dr Habumuremyi wayishinze amaze iminsi afunzwe akurikiranyweho gutanga sheki itazigamiye n’ubuhemu nk’uko byatangajwe n’Urwego rw’Igihugu rw’Ubugenzacyaha, RIB.

Itangazo rya Minisiteri y’Uburezi rifunga iyi Kaminuza rivuga ko hakozwe ubusesenguzi bikagaragara ko ifite urusobe rw’ibibazo bigira ingaruka mbi ku ireme ry’uburezi ndetse n’imyigishirize.

Itangazo ryo ku wa 30 Kamena 2020 ryashyizweho umukono na Minisitiri w’Uburezi, Dr Uwamariya Valentine, rivuga ko mu kwambura CHUR uburenganzira bwo gukora hashingiwe ku bugenzuzi bwakozwe n’Inama Nkuru y’Amashuri makuru na za Kaminuza (HEC).

Minisitiri Dr Uwamariya wasinye kuri iri tangazo yavuze ko hari n’izindi nama zakurikiyeho zahuje ubuyobozi bw’iyi kaminuza na Mineduc zagaragaje imbogamizi zitandukanye zijyanye n’imyigishirize iciriritse muri CHUR.

Christian University of Rwanda yashinzwe muri Gashyantare 2017, yatangije ishami i Kigali muri Centre Pastoral Saint Paul aho byoroheye buri wese kuza kuhigira dore ko ari mu Mujyi wa Kigali rwagati.

Mbere yo kuza gukorera mu Mujyi wa Kigali yari imaze imyaka isaga ibiri ikorera mu mu Karere ka Karongi mu Ntara y’Iburengerazuba aho yanditse amateka yo kuba ariyo ya mbere yahageze bwa mbere.

Muri CHUR hatangirwagamo amasomo arimo itangazamakuru n’itumanaho, icungamutungo n’ibaruramari, uburezi n’ibindi.

Kuva mu 2018, iyi kaminuza yatangiye kuvugwamo ibibazo birimo kudahemba abarimu n’abakozi ndetse bamwe bakaba baragiye bitabaza itangazamakuru ariko ntibigire icyo bitanga.