Dore Impamvu nyamukuru u Rwanda rutizihiza umunsi w’Ubwigenge mu birori

Dore Impamvu nyamukuru u Rwanda rutizihiza umunsi w’Ubwigenge mu birori

Mu bindi bihugu umunsi w’Ubwigenge ni umunsi ukomeye urangwa n’ibirori by’akataraboneka, gusa mu Rwanda siko bimeze kuko uyu munsi ufatwa nk’uwo Abanyarwanda bahaweho amahirwe yo kwigenga abari babayoboye bagahitamo kuyatagaguza no kwigumira munsi y’itegeko ry’umukoloni.

Impuguke mu mateka y’u Rwanda na politiki zemeza ko tariki ya 1 Nyakanga, 1962 u Rwanda rwabonye ubwigenge bwa nyirarubeshwa kuko rutigeze ruyoborwa nk’urwigenga kugeza ku wa 4 Nyakanga,1994 ubwo izahoze ari ingabo za RPA zabohoraga igihugu zigahagarika Jenoside yakorerwaga Abatutsi.

Mu kiganiro Tito Rutaremara yagiranye na The New Times yagarutse ku bijyanye n’ubu bwigenge bwa nyirarubeshwa.

Yagize ati “Ikibazo si uriya munsi ubwawo, ibindi bihugu bya Afurika byabonye ubwigenge kuri uriya munsi, ariko ikibazo nyirizina ni uko ababonye ubwigenge bahisemo kuguma bakoronijwe”

Uko Rutaremara abona ibintu bijya gusa neza n’uko senateri Mugesera Antoine, wari ufite imyaka 20 u Rwanda rubona ubwigenge abibona.

Mugesera icyo gihe wari umunyeshuri ni umwe mu bantu biboneye n’amaso yabo ibindera ry’u Bubiligi ryururutswa iry’u Rwanda rirazamurwa nk’ikimenyetso ntakuka cy’iherezo ry’ubutegetsi bw’Ababiligi.

Mu minsi yashize Senateri Mugesera yumvikanye avuga ko igisobanuro cya nyacyo cy’ubwigenge kitagezweho mu myaka 58 ishize, aho yavuze ko ibyabaye byari ‘ibya nyirarubeshwa’avuga ko Abanyarwanda babeshywe.

Ibi byose aba bagabo b’inararibonye babihuza n’umuyobozi w’ishami ryigisha ibijyanye n’imiyoborere muri kaminuza y’u Rwanda Dr Raphael Nkaka uvuga ati “ntidushobora kwerura mu buryo bw’amategeko ngo tuvuge ko ubwigenge bwabayeho”.

Dr Nkaka avuga ko mu myaka 90 ishize, igihe cy’ubukoloni cyateganywaga n’itegeko ryo ku wa 21, 1925 ryanganga u Rwanda n’u Burundi nk’igice kimwe kiri gukolonizwa.

Yagize ati “Iryo tegeko ryari nk’itegeko nshinga, ndetse na nyuma y’ubwigenge mu 1962, ryakomeje gukora. Ku bw’ibyo mu buryo bw’amategeko ntabwo twari twigenze, ariko mu buryo bwa politiki twari twigenze”

Igihugu cyaguye mu maboko y’ishyaka rimeze nka Apartheid

Umushakashatsi ku mateka ya Jenoside yakorewe Abatutsi mu 1994, Tom Ndahiro yemeranya na Senateri Mugesera ko ubwigenge bwo ku wa 1 Nyakanga, 1962 bwari ‘nyirarubeshwa’

Kuri Tom Ndahiro, asanga ishyaka rya Kayibanda ryarimakazaga ‘ivangura n’igitugu’ ritashakaga ubwigenge kubera ko “ryashinzwe ngo rikorere mu nyungu z’abakoloni.”

Yagize ati “ ubwigenge bw’u Rwanda bwo ku wa 1 Nyakanga,1962 ntacyo bwari cyo uretse intsinzi y’ikibi, ubwo ishyaka rya PARMEHUTU rimeze nka Apartheid ryaherezwaga ubuyobozi n’ababiremeye aribo bakoloni b’Ababiligi, hari ibihumbi by’inzirakarengane z’Abanyarwanda bahejejwe mu bihugu by’abaturanyi nk’impunzi zavuye mu gihugu zihungisha amagara yazo”

Iri shyaka rya PARMEHUTU ryari ryarashinzwe na Perezida wa mbere w’u Rwanda Grégoire Kayibanda muri Kamena 1957.

Iri shyaka rya kayibanda ryaharaniraga cyane uburenganzira bwo kuyobora kwa ‘rubanda nyamwinshi’ kandi rikimakaza ihame ry’uko abahutu bari hejuru y’abatutsi.

Kuri Rutaremara avuga ko Ababiligi bahisemo gutoteza no kwirukana abari bagize ishyaka ryashakaga ubwigenge bwa nyabwo bw’abanyarwanda rya Rwandese National Union (UNAR) ahubwo bagahitamo gushyigikira PARMEHUTU ngo ifate ubutegetsi binyuze mu bwigenge bw’ikinyoma.

Yagize ati “UNAR yashakaga ubwigenge bwuzuye cyangwa bwa nyabwo ariko yaje kwirukanwa n’abakoloni bafatanyije na PARMEHUTU, ku munsi w’icyiswe umunsi w’ubwigenge, habayeho amahitamo mabi yo kuguma munsi y’abakoloni aho kwibohora byuzuye. Kwibohora kuzuye kwabayeho ku wa 4 Nyakanga, 1994.”

Itariki ya 4, Nyakanga, 1994 ari nawo munsi Rwanda Patriotic Army (RPA) yafashe igihugu ihagarika Jenoside yakorewe Abatutsi mu 1994, yabaye nk’igaruriro mu mateka y’igihugu.

Uko byaba byaragenze kose, Tito Rutaremara avuga ko tariki ya 1 Nyakanga 1962 itirengagijwe kubera ko ari umunsi ubuyobozi bwariho bwabonye amahirwe meza yo kubohora igihugu ahubwo bakayatera inyoni.

Ati “bakoze amakosa bahitamo kuguma bakoronijwe aho kwigenga”

Tito Rutaremara ntiyemeranya ntiyemeranya n’abavuga ko uyu munsi utizihizwa cyane ko ari umunsi w’ikiruhuko nk’indi minsi ifite icyo ivuze mu mateka y’u Rwanda.