Intambara y’amagambo yeruye hagati y’abanyamakuru ba Radio 10 na Radio 1 bayobowe na KNC nyira yo

Intambara y’amagambo yeruye hagati y’abanyamakuru ba Radio 10 na Radio 1 bayobowe na KNC nyira yo

Gucyurirana no gusebanya ni bimwe mu bikomeje kuranga intambara y’amagambo ikomeje kuranga abanyamakuru ba Radio 10 na Radio 1, intandaro ikaba intego y’amafaranga yashyiriweho ikipe y’Igihugu ‘Amavubi’ iri gukina CHAN 2020 muri Cameroun.

Birashoboka ko hari uwaba abyumvise uyu munsi, ariko ni intambara y’amagambo ikomeje gufata indi ntera umunsi ku munsi kuva ku wa Kabiri w’iki cyumweru.

Byatangiriye kuri Munyakazi Sadate

Mu cyumweru gishize, uwahoze ari Perezida wa Rayon Sports , Munyakazi Sadate, yatangaje ko Amavubi natsinda Uganda mu mukino wabaye ku wa Mbere, buri mukinnyi azamuha agahimbazamusyi ka 100$ (hafi ibihumbi 99 Frw). Uyu mukino warangiye ari ubusa ku busa, bityo intego iba irapfuye.

Ku wa Gatatu, Nyiri Radio/TV1 na Gasogi United, Kakoza Nkuriza Charles (KNC), na we yavuze ko Amavubi natsinda Maroc mu mukino wa kabiri wo mu itsinda uteganyijwe kuri uyu wa Gatanu, buri umwe ugize iyi kipe y’Igihugu, azamuha 100$.

Izi ntego zashyiriweho ikipe y’Igihugu zakiriwe bitandukanye na benshi, aho mu kiganiro 10 Sports (cyiswe Urukiko) cya Radio 10, abanyamakuru bagikora bavuze ko bidakwiye ko Ikipe y’Igihugu ifatwa muri buri buryo, bagaragaza ko hari abayitegera amafaranga badafite kuko bazi ko ibyo bayisabye gukora bigoye cyangwa bidashoboka.

Karenzi Sam yagize ati “Niba koko yemereye abakinnyi 100$ gutsinda, bakanganya, kuki atabahaye 50$? Ntabwo dukeneye abantu bifotoreza ku ikipe y’Igihugu. Ntako batagize, bateye amapoto, baritanze, nayabahe.”

Si aba gusa bagaragaje ko intego zishyirirwaho ikipe y’Igihugu zidakwiye kuko hari n’umunyamakuru wihanukiye akavuga ko niyegukana iri rushanwa azayiha miliyari 1 Frw nubwo atayitunze mu gihe umwe mu bagore bazwi mu Rwanda, Uwimbabazi Shadia ‘Shaddyboo’, yavuze ko Amavubi nagera ku mukino wa nyuma azakuba amafaranga yatanzwe na Munyakazi na KNC inshuro 10, yatwara iri rushanwa akayakuba inshuro 20.

Uwahoze ari Kapiteni w’Amavubi, Mbonabucya Désiré, na we wemereye Amavubi miliyoni 5 Frw narenga amatsinda ya CHAN 2020, yanenze bikomeye abanyamakuru ba Radio 10 batishimiye intego yashyiriweho ikipe y’Igihugu.

Yagize ati “Ariko se bavandimwe, no gutega bibaye inkuru ngo ni uko umuntu aba azi ko bitazashoboka? Twebwe turashyigikira igihugu cyacu mwebwe mukabirwanya, n’ubu ndacyababaza muri iki? Mushinzwe iki?”

Intambara yeruye yatangiye ku wa Kane

Mu kiganiro Rirarashe cyo ku wa Kane, KNC yasubije abanyamakuru ba Radio 10 bagaragaje ko batishimiye intego yashyiriyeho Ikipe y’Igihugu, agaragaza ko batari ku rwego rumwe.

Yagize ati “Ntimukanzane mu ntambara, sinaganira n’inkwavu ndi intare. Ntiwaganira iby’Abajenerali uri umusivili, ntiwaganira iby’amadolari ukirwana na nyir’ibyondo.”

Mu kiganiro 10 Sports cyo ku wa Kane, na bo bagarutse ku byatangajwe na KNC, bavuga ko ibintu byose bidaciye mu buryo bazajya babinenga.

Bruno Taifa yagize ati “Twebwe ikintu cyose kidaciye mu mucyo tuzajya tukinenga, ubabara ababare. Hari uwo numvise ngo njye simvugana n’abantu bakirwana na ba nyir’ibyondo, ubwawe nawe nturihaza, uracyakeneye kurya urabona ko inzara ikurimo, ubwawe nturigenga ngo utangire gukora icyo ushaka [...] Iyo wihagije ukaba ufite abakozi, ntubirukana kubera amafaranga, ariko uracyasubika amasezerano y’abakozi bawe.”

“Hari abantu bita inkirabuheri, inkirabuheri burya ni zo usanga zifite amatiku. Ubwawe nturihaza, uracyashonje, bwaki uracyayifite mu magufa, banza urye. Hari abantu bamaze kwihaza, batanga inkunga batabanje no kuvuga. Shaddyboo yantangiye ubutumwa nashakaga kandi bwageze kuri ba nyirabwo.”

Nyuma y’iminota mike iki kiganiro kirangiye, abanyamakuru ba Radio 1 (mu kiganiro One Sports show) basubizanyije n’aba Radio 10, bagaragaza ko ibyo bavuze biciriritse ndetse bakwiye gusaba Imana ubwenge.

Ndayishimiye Reagan yagize ati “Umuntu washyizeho amafaranga ye atakugujije, uri hariya ugaragaza ko ubabaye, ufite icyo kuvuga, ubwo ni ubusesenguzi buciriritse, imitekerereze iri hasi, ubuswa mu mitekerereze. Ntiwafata igihe cyawe uvuga ibyo, rwana n’Amavubi atsinde, uwashyizeho amafaranga ntibikureba.”

“Yakobo 1, 5 haranditse ngo ‘ariko niba muri mwe hari umuntu ubuze ubwenge, abusabe Imana iha abantu bose ititangira kandi idacyurira umuntu.’”

Uku guhangana no guterana amagambo byongeye gushimangirwa mu gitondo cyo kuri uyu wa Gatanu, aho KNC yasubije abo yise ko bakabaye ari abashumba cyangwa ba mucoma botsa inyama.

Ati “Uyu munsi njyewe narenze ikibazo cy’ibyo kurya, ubu ikibazo mfite ubu ni uburyo nshobora guhindura ubuzima bw’abantu benshi, nkashaka ibisubizo by’abantu benshi, undi we aratekereza ibyo kurya.”

“Abantu mugitekereza ibyo kurya nta mwanya mufite, mureke abashobora gutekereza ibintu byagutse bakore kugira ngo igihugu kibone umusoro. Buri muntu agomba kumenya umuhamagaro we n’ibyo ashoboye, akabikorana ubwenge kugira ngo birusheho gutanga umusaruro.”

“Hari umuntu ushobora kuba umushumba mwiza w’inka, iyo usanze yabaye umunyamakuru biba bibabaje, niba ufite umuhamagaro wo kotsa inyama ukaza kuvuga ibintu bidahinduka nta n’ubundi bushobozi ufite bwo gushaka, wagasubiye mu nyama. Ntabushobozi bafite bwo kuvuga ibintu byubaka keretse kwabira gusa.”

Ikipe y’Igihugu iri kubarizwa muri Cameroun, ifite umukino wa kabiri kuri uyu wa Gatanu, aho ikina na Maroc ifite irushanwa riheruka guhera saa kumi n’ebyiri z’i Kigali.

Abanyamakuru ba Radio 10 barimo Karenzi Sam (iburyo) na Bruno Taifa (iburyo) bavuze ko abategera ikipe y'Igihugu bayifotorezaho

Nyiri Radio/TV1 akaba n'Umuyobozi wa Gasogi United, Kakoza Nkuriza Charles (KNC), uri ibumoso, yagaragaje ko atari ku rwego rw'abamunenze gutegera Amavubi ku mukino wa Maroc uteganyijwe kuri uyu wa Gatanu