Kenya: Umugabo ukekwaho kwiba imyenda yitabye urukiko yambaye ubusa

Umugabo w’imyaka 33 y’amavuko ushinjwa kwiba imyenda, yatunguranye ubwo yagezwaga imbere y’umucamanza w’urukiko rwo muri Kenya yambaye akenda gahisha imyanya y’ibanga gusa.

Kenya: Umugabo ukekwaho kwiba imyenda yitabye urukiko yambaye ubusa

Umugabo w’imyaka 33 y’amavuko ushinjwa kwiba imyenda, yatunguranye ubwo yagezwaga imbere y’umucamanza w’urukiko rwo muri Kenya yambaye akenda gahisha imyanya y’ibanga gusa.

Uyu mugabo witwa Jana Mugo ashinjwa kwiba imyenda aho yari yanitse, nyuma akaza guhura na nyirayo ayambaye agahita abimenyesha Polisi, ikamuta muri yombi.

Kuri uyu wa Mbere ubwo yagezwaga imbere y’umucamanza Jean Ndegeri, Mugo yavuze ko imyenda yayambuwe n’abapolisi ubwo bamutaga muri yombi kuri iki Cyumweru.

Ikinyamakuru The Citizen cyanditse ko imyenda yari yambaye atabwa muri yombi ari imwe mu yo bivugwa ko yibye, akaba yarayikujwemo kugira ngo ishyirwe aho abantu bayireba.

Uyu mugabo wakoze agashya mu rukiko, yahawe indi yambara arayanga, atsimbarara kwambara gusa iyo yambuwe. Mu rukiko yari yambaye ihisha imyanya ye y’ibanga, nayo agerageza kubikuramo.

Umucamanza yahisemo gusubika urubanza kubera ko umuburanyi yari yambaye mu buryo budakwiye, ariko Mugo ntiyagira icyo abivugaho.

Mugo ashinjwa kwiba ipantalo eshatu, amakoti n’amashati abiri abiri bifite agaciro k’amashilingi ya Kenya 4000, ku wa 10 Mutarama 2019. Anashinjwa ibindi birimo ipantalo n’ishati yafatanywe ku wa 13 Mutarama bikekwa ko ari ibyibano no gufatanwa ibiyobyabwenge ariko akavuga ko ari polisi yabimuhaye.