Umuyobozi w’icyubahiro wa Samsung wari n'umukire wa mbere muri Korea y'epfo yitabye Imana

Umuyobozi w’icyubahiro wa Samsung  wari n'umukire wa mbere muri Korea y'epfo yitabye Imana

Umunya-Korea y’Epfo, Lee Kun-hee wari Perezida wa Samsung Electronics, yitabye Imana kuri iki Cyumweru nk’uko iki kigo cyabitangaje.

Uyu mugabo wabaye Umuyobozi w’icyubahiro wa Samsung Group kuva mu 1987 nyuma y’urupfu rwa se ari na we watangiye iki kigo kiri mu bikomeye ku Isi, Lee Byung-chull, mu gihe urwo ruganda rwari rukigaragara nk’uruciriritse runakora ibintu byari bitarizerwa. Yayoboye kugeza mu 1998.

Yanabaye Umuyobozi Mukuru wa Samsung Electronics guhera mu 1998 kugeza mu 2008, nyuma aba Umuyobozi w’Inama y’Ubutegetsi ya Samsung Electronics kuva mu 2010 kugeza ubwo yitabaga Imana. Ni we wari umukire wa mbere muri Korea y’Epfo.

Byageze mu myaka yo mu 1990 Samsung yamaze guca ku nganda zikomeye zo mu Buyapani na Amerika mu bikoresho bijyanye n’igihe by’ikoranabuhanga mu itumanaho.

Ni umwe mu batumye uru ruganda rukora ibikoresho by’ikoranabuhanga ruhinduka ikirangirire ku Isi, haba mu gukora smartphones, televiziyo n’ibindi bikoresho by’ikoranabuhanga, ku buryo rugeze ku rwunguko rungana na kimwe cya gatanu cy’umusaruro mbumbe wa Korea y’Epfo.

Uyu mugabo wari ufite imyaka 78 ariko ntabwo yari akigaragara cyane mu bikorwa by’iki kigo, kuva mu 2014 ubwo yagiraga ibibazo by’ubuzima. Umuhungu we Lee Jae-yong wari usanzwe ari visi perezida, ni we wahuzaga ibikorwa byose kuva mu 2014.

Mu mwaka wa 2017 Lee Jae-yong yaje gukatirwa igifungo cy’imyaka itanu nyuma yo guhamwa n’ibyaha bya ruswa bifitanye isano n’uwahoze ayobora icyo gihugu, Park Geun-hye, ariko aza kugirwa umwere mu rwego rw’ubujurire.