USA: Wa mugore rukumbi wari ku rutonde rw’abakatiwe igihano cy’urupfu yatewe urushinge ahita apfa

USA: Wa mugore rukumbi wari ku rutonde rw’abakatiwe igihano cy’urupfu yatewe urushinge ahita apfa
Umugore rukumbi wari ku rutonde rw’abakatiwe igihano cy’urupfu azira ubwicanyi muri Leta Zunze Ubumwe za Amerika witwa Lisa Montgomery yicishijwe urushinge.

Ibi byabereye muri gereza ya Terre Haute yari afungiyemo yo muri Leta ya Indiana nyuma y’aho Urukiko Rukuru isubikiye icyemezo cyo kwegezayo umunsi w’iyicwa rye ku munota wa nyuma.

Iyi nkuru dukesha BBC iravuga ko urubanza rwe rwakurikiranwe n’abantu benshi igihe kirekire bitewe n’uko abamwunganira bavugaga ko yari afite ikibazo cyo mu mutwe kubera ihohoterwa yakorewe akiri umwana.

Lisa Montgomery w’imyaka 52 yishe anize umugore w’imyaka 23 witwa Bobbie Jo Stinnett wari utwite, mbere yo kumubaga akamukuramo uruhinja yari atwite akarushimuta. Ibi bikaba byarabereye muri Missouri mu 2004.

Montgomery niwe mugore wa mbere wari ugiye ku rutonde rw’imfungwa zigomba kwicwa kuva mu myaka 67 ishize.

Nk’uko ababonye inyongwa rye babitangaje, Montgomery yabajijwe niba hari ijambo rya nyuma ryo kuvuga afite, arasubiza ati “Oya, nta kindi”.

Ku isaha ya saa 01:31 (saa 06:31 Ku isaha ngengamasaha GMT) nibwo hatangajwe ko Montgomery ashizemo umwuka, umwe mu bunganizi be, Kelley Henry we avuga ko abagize uruhare mu iyicwa rye bose bakwiye gukorwa n’ikimwaro.

like
1
dislike
0
love
0
funny
0
angry
0
sad
1
wow
0